Statt einer Predigt: "Lockruf an den Stadtrat..."

D` Fasnadd sei a närrischa Zeit

behaupdadd seit langam ganz viele Leit.

Manchr nutzt dia Wocha fir niveauvollan Humor

- a gscheida Büttared hadd ma lang no im Ohr! -

I dengg dau an d`Auftritt unlengschd bei de Seniora

dau haud eis dr Frauabond aufs Lacha eigschwora.

Dees war geischdreich, Huat ab, mir loobadd ui sehr!

Dau griagd ma Luschd, dau will ma mehr!

Drom hau ii mir dia Woch beim Zugfahra denkt:

A fromma Predigt sei ui ond mir heit gschenkt!

Viel nettr isch gwies a klois Gedicht

- ii wois, was Schwäbischs vrschmäadd ihr nicht!

Auf Hochdeitsch klingt manches so ernschd ond so hett,

auf Schwäbisch drgega klingt moischdns sogar s` Ernschde no nett...

Ja: Ernscht isch dia Lage vor allem am Turm,

dees merkt ma besondrs bei schwerere Schtürm.

Dau haut es raa nau Brogga ond Schdoi

ond jeedr said gscheit: „Dees derf doch idd sei!

Warum wedd denn der Tuara idd gmacht?

Dees muas ma doch schaffa, dees wär doch gelacht!“

Ihr dond ui leicht. SO oifach isch dia Sach idd,

dau schbieladd vrschiedne Faktora fei mit:

Zerschd isch dau d` Schdadt, dia nomma maa.

Nau eisra Pfarrei, dia selbr idd kaa...

S` Bischtum hädd naddierlich scho no a Geld -

abr, liabe Schdadträt, handr ui dees wirklich SO vorgschtellt?

Dass ma da schwarza Peter, dean gwies koinr maa

so oifach dr Kirch zuaschiaba kaa?

Dees isch doch idd redlich, dees duad doch idd guad

wenn ma da Wäag zuaanandr idd suacha duad...

Zeema gschdanda isch ma beim Bau vor langr Zeit.

Was isch drvo blieba? - A Gegranandr isch`s heit...

Manchr vrgisst, dass eisra prächtiga Schdadt

grad durch iahre Kircha viel Scheanes zom Biata hat.

Dengadd dia Kircha ui kurz a mol weg -

Lauinga wär auf dr Landkart bloß no a oifachr Fleck!

S` Rauthaus ond dr Schimmelduara sind ja idd schlecht.

Abr erscht eisr Münschdr – gind zua, dau hau ii recht!!

isch`s Beschte vom Beschta, isch höchschdn Lobes wert

weil es zom Vollendedschda dr schpäta Gotik ghert.

So an Bau muas ma doch lieba

dees haud doch soschd koinr - s` isch idd iibrtrieba!

Freile: An Haufa Geld koschdadd der Bau

ond so viel Geld muas ma erscht a mol hau....

Ii bee ja idd bleed, dees wois ii au -

ond trotzdem: Mitanand muas dees doch gau!

Auf Sieg schpielt beim Vrhandla d` Schdadt no zur Zeit -

aus Sicht vo dr Schdadt an Kompromiss es idd geit.

Ii vrschdands zwar, doch find ii`s idd guad

wenn ma koin Millimetr bewega sich duad.

Politik isch immr a Wäag na zur Mitte

drom hau ii an d` Schdadt dia dringenda Bitte:

Sagadd idd: S` Münschtr gaud eis nix a.

D` Kirch soll sell gugga, wia ses vrhalta kaa.

Bürgerschtolz – hand ihr sowas denn idd?

Bürgerschtolz moidd: Eahrasach, mir helfadd mit!

Gschichtsträchtig isch eisra scheana Schdadt

dia au heit was zom Biata hat.

Es soll au in dr Zukunft lang no so sei.

Drom mach ii in oim fudd in ui nei:

Wenn jeder roichd am andra sei Hand

nau haud dees Münschtr no lang an Beschtand.

Uire Kindr ond Enkl werradd schtolz sei auf eich

ond glaubadd mir: DER Schtolz macht uns reich!

Schtauna ond looba werrad ui au fremde Leit

voll Reschpekt, dass s bei eis so ebbes Großartigs geit.

Ii saa`s eich nomal, ii hör idd drmit auf:

Solche bsondre Kircha findt ma idd grad zuhauf.

Idd bloß jaumra: Dia Lascht isch so groaß...

SO fällt dr Säaga eis idd in da Schoaß.

Bloß wenn a jeeds sein Toil drzua duad

wedd dees Werk gelinga – ii wünsch eis viel Muat!

Dean werr mr au braucha bei deam groaßa Pla

bei deam eisr Albert vielleicht helfa kaa.

Auf die Heilige war stets Verlass in früherer Zeit

dia solladd eis beischdau – geschtern ond heit!

Dr Albert geit a Geld eis zwar idd

aber Hoffnung vom Himmel bringt er eis mit!

Dees isch vielleicht dees, was am moischda fehlt

in ra Zeit, wo bloß s` Sichtbare zählt...

Aber au dees wedd irgendwann andrschd sei -

nau gand d` Leit wiedr in d` Kircha nei.

Nau isch ma wieder froah, dass mr s` Münschtr hand

dees nau griaßt wia eh ond je ins schwäbische Land!

Drom packa mr`s aa, es wedd scho werra

vrtrau mr aufn Heiland, eiseran Herra!

ER wohnt im Münschtr, er muaß drfür sorga

dass es fir s` Münschtr geit au no a Morga!

Drom leega mr alles in seine heilige Händ -

ER macht`s scho richtig. Jedds bee ii am End.

Blunz blauz statt Amen, jedds muaß sei Schluss

weil d` Mess weitergau muss...